Jabhadda RRA oo mowqif adag ka istaagtay Shirka Jabuuti.

SW News wpe25.jpg (8884 bytes)

Title: [SW News] (QARAN) Jabhadda RRA oo mowqif adag ka istaagtay Shirka Jabuuti.
From: []
Date: [22 May 2000]

Jabhadda RRA oo mowqif adag ka istaagtay Shirka Jabuuti.

BAYDHABO, Isniin:

Jabhadda wax iska caabinta Raxanweyn ee RRA ayaa mowqif adag ka istaagtay shirka dib u heshiisiinta Soomaaliyeed ee ay dalka Jabuuti u joogaan Soomaali ay ka mid yihiin kuwa RRA-du dirsatay.

Maxamed Cali Aadan (Qalinle) oo afhayeen u ah jabhaddaas, guddoomiyena ka ah gobolka Bay ayaa shalay ku eedeeyey dowladda Jabuuti inay ka leexatay marinkii loogu talo galay inuu maro shirka dib u heshiisiinta Soomaaliyeed.

"Dowladda Jabuuti waxay rabtaa inay Soomaaliya u soo dhisto dowlad gacan ku rimis ah oo u adeegaysa kuwa haysta dhulka dadka dulman" ayuu ku yiri wariyaha QARAN Mr. Qalinle oo intaasi raaciyey "wararka naga soo gaaraya Jabuuti waxay sheegaan in ergadii beelaha Digil iyo Mirifle ee halkaasi joogtay loo diiday tasiilaadka ay isgaarsiintu ka mid ka tahay si ay dadkooda ula soo xiriiraan, sidoo kalena loo diiday inay fekerkooda si xor ah u dhiibtaan".

Mr. Qalinle oo Baydhabo jooga ayaa ka codsaday dowladda Jabuuti in dalkoodii dib loogu soo celiyo, wuxuuna sheegay inay iyagu diyaar u yihiin inay bixiyaan Tikidhada diyaaradaha ergooyinku soo raacayaan.

Qalinle wuxuu sheegay in shirkasta oo dib u heshiisiin ah uusan qabsoomi karin inta la haysto wax uu ku tilmaamay dhul iyo hanti ay dad leeyihiin, "shirka Jabuuti waxaa ka qaybgalaya kuwo tuulooyin gubay dadna baabuur ku jiiday" ayuu yiri Mr. Qalinle oo ka gaabsaday inuu sheego kuwa ay yihiin, wuxuuna intaasi raaciyey in mas’uuliyiinta RRA ku midaysan yihiin in aanay aqoonsan waxa ka soo baxa shirkaas.

(QARAN PRESS)

[ News]