19 May 2007 04:14

SOMALIA WATCH

 
Country
  • Title: [SW Country](QARAN PRESS) Baare Gaar ah oo Qaramada Midoobay ka tirsan oo ku baaqay in Maxkamad la soo taago Hogaamiye Kooxeedyada Soomaaliya.
  • From:[]
  • Date :[22 April 2000]

Baare Gaar ah oo Qaramada Midoobay ka tirsan oo ku baaqay in Maxkamad la soo taago Hogaamiye Kooxeedyada Soomaaliya.

GENEVA, Jimce:

Baare gaar ah oo ka tirsan Qaramada Midoobay ayaa ku baaqay in maxkamad lagu soo taago dambiyadii dagaalka iyo kuwii aadanaha ee ay galeen hogaamiye kooxeedyada Soomaaliya.

Mss Muna Rashmawi oo warbixinadii xaqiiqo raadiska ahaa ee ay ka diyaarisay Soomaaliya oo ay horey u booqatay u gudbisay guddiga xuquuqda aadanaha Qaramada Midoobay u qaabilsan ayaa sheegtay in inta badan isdilka ka dhacaya dalka yihiin dambiyo dagaal ee aysan ahayn kuwa siyaasad la xiriira.

Iyadoo magaalada Geneva shalay uga waramay idaacadda VOA barnaamijka Day Break Africa ayey sheegtay inay soo ogaatay falal badan oo noqon kara dambiyo dagaal iyo kuwo aadaminimo ay ka dhacaan koonfurta iyo bartamaha Soomaaliya, sida dil ka dhan ah nolosha dadka, weeraro lagu qaado dadweynaha iyo hantida, ku darista maleeshiyooyinka carruur da’doodu ka hoosayso 16 sano jir, ku xadgudubka dadka laga tirada badan yahay, amarka sharci daridda ah, barakicinta rayidka iyo u diidista ay maxkamad u leeyihiin, kuwaasoo hoos imaanaya sharciyada mushtamaca caalamka.

Mss Rashmawi ayaa mas’uuliyiinta dalalka dibadda ka codsatay inay qaadaan talaabooyin sharciga lagu horkeenayo kuwa lagu tuhunsan yahay inay dambiyadaasi ka galeen Soomaaliya.

Mar ay ka hadlaysay nabadgelyada ka jirta gobollada dalka Soomaaliya ayey sheegtay in gobollada waqooyi galbeed, iyo waqooyi bari ay maamulada ka jira horumar ka sameeyeen nabadgelyada, halka gobollada Soomaaliya ay ka jiraan isdil.

Waxay sheegtay inaysan nabadi ka jiri Soomaaliya cadaalad la’aan, iyadoo intaasi sii raacisay inay soo baxeen awoodo cusub, gaar ahaan bartamaha Soomaaliya kuwaasi oo ah maxkamado taageero ka haysta maleeshiyooyinkooda iyo dhaqaale ay ka helaan ganacsatada si ay tuugada uga sifeeyaan waddooyinka.

Waxay beesha caalamka ugu baaqday inay xil iska saarto difaaca dadka rayidka ah ee jooga meelaha ay colaaduhu ka jiraan, waxayna intaasi raacisay sii wadista hubeynta kooxaha kala gedisan ee Soomaaliyeed ee dagaalamaya ay ha kinayso kaalmada bini’aadaminada siina dheeraynaynayso dagaalada iyo wixii soo raaca, sidaasi darteedna ay tahay inay dhowraan dowladaha caalamku cuna qabatayntii hubka ee Qaramada Midoobay ku soo rogtay Soomaaliya.

 

(QARAN PRESS)


[Country]

Copyright © 1999 by somaliawatch.org.  All Rights Reserved.  Revised:  19 May 2007 05:02 AM. Webmaster HomePage