19 May 2007 04:14

SOMALIA WATCH

 
Country
  • Title: [SW Country]  (KAAHA BARI -BOSAASO)  MUQDISHO WAXA AY NOQONAYSAA MEEL CAALAMKU KA DAAWADO  SIDA BINI’AADAMKU WAX U BUR-BURIYO.
  • From:[]
  • Date :[27 April 2000]


 MUQDISHO WAXA AY NOQONAYSAA MEEL CAALAMKU KA DAAWADO
                                SIDA BINI’AADAMKU WAX U BUR-BURIYO.

21 APRIL 2000   KAAHA BARI  SANNADKA 9aad    CADADKA 471


 Aragtida yaabka leh ee aan kala kulmay Muqdisho, waxa ay noqotay mid raad ku yeelatay dareenkaygii, waxaana is-beddelay fikraddii aan hore uga haystay ee ahayd in bur-burka ka dhacay halkaas ay wuxuun ka hareen ku saabsan astaantii dawlad nimadii soomaliya ee in ku dhow nus qarniga la dhisayey.

Suuqa xamarweyne ee dahabka lagu gadi jiray waxa uu isu beddelay garoon kubadda ay ku ciyaaran ciyaalku, halka aad ka baqaysid in aad isaga hortimaadaan waraabayaal jidkii Shabeelle iyo taalladii Xaawo Taako oo dhirta ka baxday ay ka dhigtay kaymo jiq ah oo cidla ah.

Goobihii  taariikhiga ahaa iyo dhismayaashii xudunta u ahaa ilbaxnimadii iyo dawladnimadii somali-ya, waxaa bur-buriyey oo la tegey madaafiicdii iyo hoobi-yayaashii ay is la dhacayeen qabiilooyinkii ku diririyey halkaa, iyada oo wixii muqaal ahaan ka haray aadan garanayn in laguu sheego mooyee.

Meesha loogu yeero khadka cagaaran oo u kala qaybisa xamar qabaa’ilka waaweyn ayaad ku arkeysaa yaabka ugu badan marka aad istaagto, Bangiyadii, Hoteeladii iyo daarihii dhaadheeraa ee muqdisho beri ugu faani jirtay caasimadaha kale, waxaa ka haray tiirar haawanaya oo  hooy iyo dhufays ba u ah  burcadda hubaysan ee  wax disha waxna dhacda, iyada oo maanta xamar cashar laga barto u noqonaysa caalamka Sid aaddanuhu   wax u bur-buriyo.

Xarumihii caafimaadka marka laga reebo cisbitaal Martiini oo ay ku jiraan dad naafo ah mooye intii kale waa la bur buriyey oo ma jiraan wax ka dhaqani.

Nadaafad xumada jirta darteed waxa ay sababtay, in cudurka daacuunku uu ku negaado halkaa, oo  maalin kasta ay 5 qof ugu dhimato, iyada oo qashinka waddooyinka qaarkeed buuxiyey uu noqday buuro laaleeg bacaad yada  xamar jajab, kaas oo wax guraya aanay jirin.

Inkasta oo uu ka jiro ganacsi ballaaran oo xawli ku socda, Sida ka muuqata suuqa ganacsi ee Bakaaraha oo la oran karo waa kan ugu wayn Soomaliya, haddana dadka intooda badani waa sabool cayr ah, oo la legdamaya nolol maal meedkooda, waxaadna meelaha qaarkoo   ku arkaya dad nafaqa darro hayso, taasina waxay in tusinaysaa Sida muqdisho nolosha ugu kala tagtay.

Kooxaha ugu dhaq-dhaqaaqa rooni hadda waa maxkamadaha Isla-amiga ah oo shacabka tixgelinta iyo kalsoonida kaga helay hawlaha nabadgelyo ee ay qabtaan iyo ganacsato macaashta malaayin shillin oo abuurtay maleeshiyoo-yin hubaysan oo danahooda u ilaasha, kaddib markii ay meesha ka baxday awooddii hoggaamiya-yaasha siyaasadeed ee muqdisho oo runtii maanta la oran karo, waa ilko beeleen.

Waxaana fur-furaanta jawiga qayb weyn ka qaata Idaacadaha iyo Telefishanada dadka gaarka ahi leeyihiin oo mudooyinkan dambe xamar ku soo badanaya, kuwaas oo dadka u gudbiya doodo furan oo aan lagu kala gabban, lagagana hadlayo arrimo dhinacyo badan leh, taasina waxay nafis siisay in badan oo bulshada ka mid ahayd oo duruufihii jiray ay u saamixi waayeen in ay afkaartooda muujiyaan.

Adeegyada waxbarash-ada in kasta oo ayan jirin waxbarasho baahsan oo dadku wadahelo, haddana waxaa jira dugsiyo gaar ah oo  ururro samafal oo waddani ah iyo shakhsiyaad ay maamulaan.

Dhinacayada korontada iyo biyaha kama dambayn dawladdii soomaliya in kasta oo ay jiraan dad gaar ah oo haysta matooro waaweyn  oo ka ganacsada  dabkooda kuwaas oo xaafadaha iyo meelaha ganacsi guluubyo kaga lacag qaata, haddana guud ahaan magaaladu waa goob mugdi ah.  

 Waxaa inta badan la hadal hayaa shirka jabuuti, oo bulshadu taageer santahay, halka ay qab-qablayaasha intooda badani ka biya diidsan yihiin, iyada oo la doonayey in la qabto inta aan la gaarin shirka Jabuuti, shirweyne Hawiye si meesha looga saaro, khilaafka iyo kala qayb sanaanta fog ee ku kala dhex jirta beelaha, laakiin arrintaasi ma suura gelin oo farqiqa u dhexeeya  iyo is-aamin ala’aanta iyo kala shakiga jira ayaa curyaaminaya.


[Country]

Copyright © 1999 by somaliawatch.org.  All Rights Reserved.  Revised:  19 May 2007 05:02 AM. Webmaster HomePage