Shir
ayaa lagu wadaa inuu dhawaan uga furmo kooxo
Somaliyeed magaalada Nairobi ee dalka Kenya, shirkaas oo
daba jooga shirkii mudo hadda laga joogo bil iyo dheeraad
isla magaaladaas ku dhexmaray Cusmaan Caato iyo Mawliid
Macaani oo dhinac ah oo sida ay sheegeen matalayay golaha
SRRC iyo Cabdiqaasim Salaad iyo rag la socday oo matalaya
DKMG ah.
Shirkaan
cusub ayaa ilaa hadda waxaa ka soo qaybgalaya oo kaliya
kooxihii horay shirka ugu yeeshay Nairobi.
Natiijada
ka soo bixi doonta ayaa u muuqata midaan wax badan ka
duwanayn tii shirkii hore Nairobi lagu qabtay oo isagu u
dhacay qaabkan:
Warar
diblamaasiyadeed
ayaa xaqiijinaya in shirkaasi hore ee Nairobi uu ka
dhashay shirar hoose oo horay Muqdisho ugu dhexmaray
Cusmaan Caato oo ka mid ah kooxaha diiday wixii ka soo
baxay shirkii Carta iyo DKMG ah, kaasi oo xitaa gor gortan
lacageed ay ku gaareen sidii Cusmaan ugu soo biiri lahaa
DKMG ah, markii heshiiskaas qarsoodiga ahi uu ka dhacay
Muqdisho ayaa ku dhawaaqistiisa loo arkay in looga
faa'iidaysto dhanka diblaamisiyada gaar ahaan tan
dawladaha Dariska la ah Somaliya, fikirkaan ayaa waxaa lug
weyn ku lahaa dawlada Jabuuti oo iyada dalkeeda lagu
qabtay shirkii lagu dhisay DKMG ah ee Carta, isla
markaana uga wakiilka ahayd dawladaha carbeed oo ay
ugu horayso Masar oo iyadu gadaal ka taagnayd Jabuuti tan
iyo markii ay fooda isku dareen Dawlada Itoobiya arimaha
Somaliya, DKMG ah iyo dawladaha taageera ayaa u arkay
inuusan heshiiska Cusmaan Cato iyo DKMG ah waxbadan
soo kor dhinayn sidii kuwii ka horeeyay ee Maxamed Qanyare
iyo Xuseen Xaaji Bood haddii ay wali maqan yihiin kooxihii
muhiimka ahaa ee Somalida iyo kaalinta muhiimka ah ee
dawladaha kale ee dariska la ah Somaliya.
Kenya
oo ah dal deris la ah Somaliya ahna dalka labaad ee
xuduudka ugu dheer la wadaagta Somaliya marka laga tago
Itoobiya, Kenya oo u muuqatay inay tahay dal dhexdhexaad
ka ahaa dawladaha Carabta iyo kuwa gobolka ee isku jiid
jiidanaya arimaha Somaliya ayna u dheer tahay inay tahay
dal xaga diblaamisayada gobolka magacweyn ku leh, isla
markaana ayan cadayn mawqifkeeda wixii ka soo baxay
shirkii Carta ayaa loo arkay in looga faa'iidaysto ku
dhawaaqista heshiiska hoose ee dhexmaray DKMG ah iyo
Cusmaan Caato.
Mawliid
Macaani oo ahaa gaashaanle dhexe oo ka tirsanaa ciidanka
Booliska Somaliya, soona noqday garsoore Kubadda Cagta,
marna ahaa xoghayaha joogtada ah ee golaha shacabka
Somaaliya xiligii xukuumadii Maxamed Siyaad Barre, xiligii
dagaalada sokeeyana sheegay inuu yahay gudoomiyaha ururka
Jareer Weyn sida uu ugu yeero Mawliid garabka mid ah oo ay
isku haysteen jagadaas Maxamed Arbow Ramadaan oo garabka
SSA ee Cali Mahdi ahaa iyo Sheekh Jaamac oo isaguna ahaa
garabkii SNA ee Caydiid, Mawliid oo mudooyinkaan
dambe gacanta midig ee Cusmaan Caato noqday, una raacayay
safaradii Cusmaan ee Hargaysa iyo wadamada gobolka,
Mawliid oo ugu dambayntii soo gaaray jagada xoghayaha
Golaha SRRC wuxuu qorshan DKMG ah iyo Cusmaan Caato
u noqday fure aad looga faa'iidaysan karo markay timaado
darajada uu ka hayo ururka SRRC iyo aqoonta wada
shaqayneed ee ay isu lee yihiin Madaxweynaha DKMG
Cabdiqaasim oo ay la soo wada shaqeeyeen Dawladii Maxamed
Siyaad Barre.
Sidda
uu noo sheegay qof xog ogaal ah oo aan doonayn in la
magacaabo waxaa qorshaha ugu weyn ee shirka Nairobi
ahaa in lagu saxiixo heshiiskaas Muqdisho lagu gaaray si
beesha caalamka loogu tusiyo heshiis guud oo
dhexmaray kooxaha Somalida (SRRC) oo iyagu aanba Nairobi
tagin iyo DKMG ah, tani oo sigaara loogu raadinayay
taageero aqoonsi oo DKMG ahi kaga hesho ugu yaraan Dawlada
Kenya oo mawqifkeeda shirkii Carta uu yahay mid aan
cadayn, isla markaana haddii dawlada Itoobiya ay
shirkaas Kenya diido in ay iska horyimaadaan Kenya
oo loo muujinayo inay hirgalisay heshiiskaan.
Warar
lagu kalsoon yahay ayaa sheegaya in ay dawlada Kenya u
tageen rag ay ka mid yihiin Cusmaan Caato iyo Mawliid
Macaani , waxayna dawlada Kenya u sheegeen in ay
matalayaan Golaha SRRC, waxayna ka dalbadeen in ay Kenya
wada hadalsiiso Golaha SRRC iyo DKMG ah ayna diyaar
u yihiin in la gaaro heshiis, DKMG ah ayaa iyana dhankeeda
ka codsatay Dawlada Liibiya inay Liibiya
madaxweynaha Kenya ka codsato inuu Marti galiyo shir ay
isugu yimaadaan Golaha SRRC iyo DKMG ah taasi oo Liibiya
Ogolaatay, Dawlada Liibiyana waxay markaas ka dib ka
codsatay Kenya inay Marti galiso shir kooxaha Somalida
lagu heshiisiinayo oo ay Liibiyana bixiso wixii kharash ku
baxaya.
Dawlada
Kenya oo rumaysatay in Mawliid Macaani iyo Cusmaan Caato
ay si buuxda wakiil uga Yihiin golaha SRRC, kana heshay
Liibiya codsi iyo kharshkii Somalida la isugu
keeni lahaa ayaa ku dhaqaaqday Casuumad loo diray DKMG ah
iyo xubnihii kale ee Golaha SRRC, taasi oo markiiba ay
DKMG ah ay ku aqbashay si deg deg ah iyadoo ku
xoojisay inayba riday Dawladii Cali Khaliif Galayr si ay
ugu muujiso Kenya inay diyaar u tahay heshiiska,
Kooxda SRRC ayaa iyagu casuumadii Kenya ay ku noqotay wax
deg deg ah, waxayna sheegeen inay shirkaan ku hoos jirto
khiyaamo qarsoon, waxayna kaga jawaabeen siday horayba ugu
sheegi jireen in ay shirka imaanayaan oo kaliya haddii
looga soo qaybgalo dhamaan dhinacyada Somaliya si siman oo
aan kooxina sheeganayn wax darajo ah (Dawladnimo).
Dawlada
Itoobiya oo laftigeeda qorshaha shirkaan kaga
warheshay Casuumada Kenya ee loo diray kooxaha Somalida
ayaa iyana qaaday talaabo deg deg ah, waxayna dhankeeda
casuumaad ugaga dirtay kooxaha Somaalida ee ay xiriirka
lahaayeen iyadoo ku casuntay inay dalkeeda isugu yimaadaan
taasi oo ay aqbaleen.
Tani
waxay keentay inay Nairobi tagaan Wasiirka Arimaha Dibada
Jabuuti oo qorshaha shirka dawladiisu wax kaga jirtay,
Madaxweynaha DKMG ah Cabdiqaasim oo matalaya Maamulaka
Carta iyo Cusmaan Caato iyo Mawliid Macaani oo iyagu
sheegay inay matalayaan golaha SRRC oo gabi ahaanba
intiisii kale ay diideen shirkaas Nairobi ka qaybgalkiisa
badalkiisiina shir wada tashi ah ku yeeshay Itoobiya
kaasi oo gunaanadkiisii ay ku sheegeen mawqifkoodii hore .
Waxaa
shirkaas Nairobi ka soo baxday in Kenya ayna wax
badan ka ogayn shirka ay casuumadiisa Somalida u ugu
yeertay dalkeeda, oo ay ku dhacday qorshe ay soo sameeyeen
Somalida inta Nairobi tagtay iyo dawlado kale.
Kenya
laf tigeedu way garatay in waxbadani ka qaldanaayeen
qorshaha shirkaan ay isugu yeertay, markay timaado
kaalinteedii dhex dhexaadnimo ee arimaha Somaliya, oo ay
dhex dhexaad ugu ahayd Somalida iyo dawladaha kale sida
Itoobiya oo dhinac ah iyo dawlada Jabuuti oo kana wakiil
ah dawladaha carbeed ee ay ugu horeeyaan Masar iyo
Libiya oo iyagu dhawr goor oo hore fooda isku dareen
arimaha Somaliya Itoobiya oo ka wakiil ah Ururka Afrika.
Shirkaas
hore wuxuu ku soo dhamaaday iyadoon wax natiijo ah lagu
gaarin, marka laga reebo iyadoo lagu soo balamay inay
Kenya ka shaqayso inay dawlada Itoobiya ku qanciso in
kooxaha ay gacan saarka leeyihiin yimaadaan shirka
Nairobi, loona tusay Kenya in Itoobiya ay tahay tan shirka
Nairobi iyadu kala dhantaashay, balse Gudoomiyaha
RRA ahna gudoomiyaha wareega ah ee golaha SRRC ee xiligaan
Xassan Maxamed Shaati Gaduud ayaa isagu tagay Nairobi
markii shirkii dhamaaday ka dib isagoo la kulmay
madaxweynaha Kenya oo uu u sheegay Mawqifkooda rasmiga ah
ee arimaha dib u heshiisiinta, isagoo ka sheegay in
Ururkooda SRRC ay ka dhab tahay dib u heshiisiin laga garo
arimaha Somaliya taasi oo looga baahan yahay sidaas oo
kale dhinacyada kale ee Somalida, wuxuuna
sheegay wixii shir la isugu imanayo in kooxaha oo dhami si
siman uga soo qaybgalaan iyadoon darajo gaara kooxina
sheeganayn, wuxuu raaciyay intaas in sidda keliye ee dib u
heshiisiin loo dhan yahay lagu heli karo ay tahay iyadoo
hindisaha nabad raadintu uu kawada yimaado ururka IGAD ee
ay ku bahooween dowladaha Bariga Afrika, ma ahan ayuu yiri
in kolba dowlad gaar ihi xil iska saarto arimaha Somaliya.
Isku
soo duuboo shirka hadda ay isugu tagayaan Nairobi DKMG ah,
Mawliid Macaani oo isagu marakan aan sidan darajadii
(Xoghayaha Guud ee SRRC) oo uu kaga qayb galay shirkii
hore iyo Cusmaan Caato ayaa dadka aadka ula socda
qorshahooda waxay sheegayaan in kaliya lagu soo saxiixayo
heshiiskii bilaha ka hor dhexmaray Cusmaan Caato iyo DKMG
ah iyadoo loola jeedo in lagu raali galiyo Madaxweynaha
Kenya fadeexadii shirkii hore ka dhalatay.
Heshiiska
DKMG ah iyo Cusmaan Cato ayaa ilo xog ogaal ahi noo
sheegeen in ay qayb ka tahay in dawlada uu soo
magacaabi doono Xasan Abshir ay qayb ka noqdaan rag kooxda
Cusmaan Caato ka mid ah iyo Mawliid Macaani oo isaga la
xaqiijiyay inuu ugu yaraan heli doona jago wasiirnimo,
warku wuxuu sheegayaa in Cusmaan Caato uusan qof ahaan ka
qaybgali doonin jagooyinka dawlada balse uu u matali doono
door kale oo aan la cadayn, isagoo heli doona isla
markaana lacagtii horay loogu balan qaaday.
Ka
qaybgalida Cusmaan Caato ee DKMG ah ayaa loo arkaa mid
faa'iidada dawlada Cabdiqaasim ay ka helaysaa ay tahay
in taageerada Beesha Sacad ee Xuseen Caydiid ay ku
yareeyaan mar haddii uu ku soo biiro Cusmaan oo ay Xuseen
isku beel yihiin.
Xuseen
iyo Cusmaan ayaa waxaa u dhexeeyay loolan xagga awooda
beesha dhexdeeda ah marka laga soo tago dhimashadii
Maxamed Farax Caydiid oo ku dhintay dagaaladii dhexmaray
Maleeshiyada Cusmaan Caato iyo tii Dawladii Salbalaar ee
Maxamed Farax Caydiid, Waxayaabaha Cusmaan Caato dadajiyay
heshiis uu la galo Dawlada Cabdiqaasim marka laga tago
arimaha dhaqaalaha ee uu ka helayo heshiiska DKMG ah uu la
galay ayaa la sheegayaa inay tahay iyadoo Cusmaan
uusan kaalin weyn oo siyaasadeed ka helin golaha SRRC oo
Xuseen Caydiid uu buuxiyay booskii Beeshoodu ka heli
lahayd golahaas, Cismaana marakan uu doonayo inuu kaalin
muuqato uu ku yeesho DKMG ah si uu fursad ugu helo
loolanka awoodeed ee Beesha dhexdeeda ka socda.
Waxaa
soo uruuriyay
M.
Kaahin
- Muqdisho
AllPuntland News.