UJEEDO:- Bayaan Saxaafadeed (Press Release) oo ay soo saartay Dawlad Goboleedka Puntland

Puntland waxaa la aasaasy 1998 sida ku cad Dastuurka ku meel gaarka ah waxaa la laalay dhammaan ururadii iyo abaabul kasta oo siyasadeed oo keenaya kala qaybsanaan iyo iska horimaad bulshada ku nool Dawlad Goboleedka Puntland.

Maamulka Dawlad Goboleedka Puntland wuxuu mudnaanta 1aad siiyey sugida nabad gelyada, xasiloonida gudaha iyo xiriirka darisyada. Waxaana la xaqiijiyey nabaddii iyo xasiloonidii taas oo ay Dawlad Goboleedka Puntland inay ku guulaysatay qireen dadka Puntland iyo adduun weynuhuba.

Shirkii Jabuuti ee arrinta Soomaaliya lagaga hadlayey, Puntland iyo dhammaan qaybaha muhiimka ah ee Soomaaliyana ku gacan sayreen ka dib markay Jabuuti caddaysatay khiyaano, iska horkeenid iyo magacaabid maamul aan loo dhammayn oo hurinaya dagaal iyo colaad ka cusboonaata Soomaaliya. Markiiba Jabuuti waxay ku dhaqaaqday inay Puntland mudaharaad iyo kharibaad ka fuliso taasoo ay ku guul daraysatay marar badan.

Xukuumadda Jabuuti waxay ku talo baxday inay ku dhawaaqdo, maamul aan loo dhammayn waana kan loo yaqaan Kooxda Carta, Jabuutina u taqaan Dawladda Soomaaliya.

Kooxda Carta waxay Muqdisho ka degen yihiin dhowr Hotel oo aagga waqooyi ku yaal. Sidii la faliyey, durba colaad iyo fidmo bay ka oogtay qaybaha Soomaaliya waxaana tusaale u ah arrintaas:

1. Dagaalkii ay ka abaabuleen Muqdisho-Balcad
2. Dagaalkii Muqdisho- Baydhabo
3. Dagaalkii Muqdisho- Tiyooglow
4. Dagaalkii Muqdisho- Garbahaaray, dagaaladaas oo dhammaantood lagu jabiyey.

   Kooxda Carta, waxay u qalab qaateen inay qalalaase ka ridaan Dawlad Goboleedka Puntland oo nabad iyo Xasilooni ku sugnayd, Shirkii Jabuuti iyo kooxda Carta ka hor.

   Shirkii Carta iyo wixii ka soo baxay Dawlad Goboleedka Puntland waxay ka soo saartay 1. sharciga Lr 10 taariikhdiisuna ahayd 29/7/2000, oo qeexaya ciddii sheegata Carta in talaabo sharciga waafaqsan la mariyo.
   2. Ka qayb galayaasha aan xil sidana inay Puntland ku soo noqon karaan
   3. Ciddii abaabusha fal xasiloonida Dawlad Goboleedka Puntland wax u dhimaya in Maxkamad la hor geeyo oo sharciga lagu qaado.

   Dawlad Goboleedka Puntland waxay la socotay oo u dulqaadanaysay muddo dheer inay jiraan qaar ka mid ah ka qayb galayaashii Carta, oo kaashanaaya kuwo xag jira inay ka wadeen abaabulo khatar galinaya Nabadda, Xasiloonida iyo Dhaqaalaha Dawlad Goboleedka Puntland. Xukuumadda Puntland ayadoo la socota arrimahaas waxay door bidday inay la sugto illaa ay bareeraan oo fal dambiyeed ku dhaqaaqaan. Waxaa tusaale u ah falalka ay ku talaabsadeen:-

    

   • Dacaayad iyo been abaaur lid ku ah Dawlad Goboleedka Puntland
   • Mudaharaad aan sharci ahayn, ayagoo sita Calamo dawlado shisheeyaa kuna dhawaaqaya hal ku dhigyo xambaarsan taageero shisheeye oo lid ku ah dawlad goboleedka Puntland
   • Mudaharaadkaas dhibaatooyinka ay geesteen waxaa ka mid ah:
     • Kicin dadweyne iyo ku dhawaaq taageero shisheeye iyagoo sita Calamo dalal kale.
     • Boob hanti dadweyne ( danyarta waratada ah)
     • Khatar galin ah bililiqaybsi magaalada Boosaaso
     • Weerar iyo dhagax tuur saldhiga Booliska Boosaaso.

   Ciidamada Booliska oo xabado kor u ridaya ayaa kala dareershay ka qayb galayaashii mudaharaadka, abaabulayaashiina qaar xir xiray, qaar dhuuntayna raadinaya. Nasiib darro xabad darbi ku dhacday oo soo noqotay baa gabari ku geeryootay, dhagax tuurkiina waxaa ku dhaawacmay dhowr Booliska ah.

   Intaa waxaa dheer in dhalinyaro la khatalay lagu aruuriyey hab qabiil soocan ah oo la geeyey baro deegaan kooda ah si ay jid-gooyo, qul qulato, kala xirid Gobolada Dawlad Goboleedka Puntland iyo khatar galinta xasiloonida iyo nabad galyada guud u sameeyaan.

   Xukuumadu waxay la xaajootay, wax garadka iyo Odoyaasha Gobolka Bari si looga hortago fidmada ay wadaan wax xun ka taliyayaalku, taasoo waxna ka qabsoomeen inta kalana haddii aan la dhamays tirin amnigu deg deg wax uga qaban doono. Xukuumadda Dawlad Goboleedka Puntland u dulqaadan mayso, tillaabo deg deg ah oo sharciga waafaqsan ayeyna kaga hortageysaa fal kasta oo lid ku ah nabad galyada iyo xasiloonida Dawlad Goboleekda Puntland.

   Sidaas darteed waxaa looga digayaa kuwa u adeega shisheeyaha iyo xag jirayaasha inay ka waantoobaan falalka dambiga ah.

   Waxaan beeninaynaa, dacayaadaha raqiiska ah oo aan salka iyo baarka lahayn ee ku saabsan afduubka dad ka tirsan dawlad Goboleedka Puntland, taasoo ay faafiyeen war xumo tashiil la ogyahay ujeedooyinkooda iyo cidda ka dambaysa.

   Ugudambayntii, dawlad Goboleedka Puntland waxay digniin culus usoo jeedineysaa, Kooxda carta iyo Xukuumada Jabuuti oo asaaskeeda ka dambaysay kuna dhiiri galisa mu'aamaraadka ay maleegeyso Kooxda Carta una ah afhayeen iyo taageere, haddaba dawlad Goboleedka Puntland si ay u sugto nabadgalyada dadkeeda iyo dalkeeda, waxay qaadaysaa tallaabo kasta oo ku haboon in lagaga hortago cid kasta oo waxyeelo u geysanaysa jiritaanka nabadgalyada iyo xasiloonida ummadda reer Puntland.

   Guul Eebe iyo Horumar

   SAXIIX (SIGNED BY):
   Saciid Maxamed Maxamuud
   Wasiirka Wasaaradda Maaliyadda DGPL

   ---