JAMHUURIYADDA SOOMAALIYA

 

GOLAHA DIB-U-HESHIISIINTA & DIB-U SOO CELINTA SOOMAALIYEED

 

Date: 24/04/2001

 

Ku:                Idaacadda Dalka                                                                      Rugtooda

                      Idaacadda BBC                                                                       Rugtooda

                     Wakaaladda Wararka                                                              Rugtooda

                     Wargeysyada Madaxa Banaan                                                 Rugtooda

 

 

Ujeeddo:                 WAR-SAXAAFADEED LA XIRIIRA KAL FADHIGII 1^AAD EE GDDS

 

 

Maanta oo ay taariikhdu tahay 18/04/2001 waxaa kalfadhigii 1^aad ku yeeshay magaalada Baydhabo GDDS. 

Kalfadhigaas waxaa mahad ballaaran looga soo jeedshay, shacabka iyo hoggaanka RRA sidii diiranayd ee aan kala harka lahayn oo ay u soo dhaweeyeen imaatinka GDDS ee Xarunta Baydhabo iyo taageerada buuxda oo ay u fidiyeen dhismaha GDDS. 

Goluhu wuxuu si gaar ah fiiro uga yeeshay dhibaatooyinkii shacabka Soomaaliyeed ka soo gaaray dagaalladii sokeeye ee soo jiitamaya tobankii sano ee la soo dhaafay siiba deegaanada RRA, wuxuuna u soo wada jeedinayaa tacsi murugo iyo tiiraanyo leh.

 

·         Goluhu wuxuu si weyn u falan qeeyey ugana dooday daganaansho la'aanta ay kooxda Carte ku soo kordhisay xaaladda guud ee dalka Soomaaliyeed, taasoo ay ku naf waayeen muwaadiniin badan oo wadanka gobolladiisa kala duwan ku kala baahsan, waxaana si gaar ah loo xusay dhacdooyinkii dagaal oo ka dhacay dhawaan magaalooyinkii Muqdisho iyo Balcad oo ay sababeen kooxda Carte. Goluhu wuxuu u tacsiyeynayaa eheladii iyo qoysaskii ay ka baxeen geesiyadaas naftooda u hibeeyey xajinta nabadda.

 

·          Goluhu wuxuu si qoto dheer u darsay xaaladda dhaqaale ee wadanka iyo lacagta been abuurka ah oo kooxda Carte iyo shurakadooda ay ku hafinayaan wadanka si loo silic dilyeeyo loona xaalufiyo awoodda dhaqaale ee shacbiga Soomaaliyeed oo markii hore aad u liidatay, una baahnaa daryeel aadaminimo iyo nabadeyn guud.

 

·          Waxaan nasiib daro ah kooxda Carte iyo shurakadooda si ay uga baxsadaan carada shacab weynaha Soomaaliyeed ay bilaabeen in eeda falkooda guracan ay dusha ka saaraan Dawladda Itoobiya iyo maamul Goboleedyada dalka ka jira, taas oo xaqiiqda ka soo horjeedda cidna aan lagu habaabin karin, ayna muujinayso wejiga dhabta ah ee shirkadda Carta lagu soo dhisay.

 

·          Waxaa fool xuma ah in kooxda Carte ay ku tilmaanto diidmada shacab weynaha Soomaaliyeed ee ku wajahan falkeeda guracan duulaan shisheeye ee dalka Soomaaliyeed lagu soo qaaday si ay ugu beer laxawsato bulshada Soomaaliyeed iyo beesha Caalamka oo aan moogeyn xaaladda Soomaaliyeed, xog ogaalna u ah in isha ay dhibaatadu ka soo burqanayso tahay kooxda Carte ee keliya oo ayadu isu caleema saartey dawladnimo aysan ummadda raali ka ahayn, ha noqoto caasimadda gudaheeda iyo gobollada dalkaba,

 

·          Golaha DDS wuxuu ku dhaleecaynayaa kooxda Carte xeeladaheeda kala duwan ee naxariis darada ah, isla markaasna wuxuu Goluhu ku baraarujinayaa beesha caalamka in kooxda Carte marka hoos loo sii dhuuxo barnaamij howleedkeeda ay ku sifowdey ka ganacsiga dhibaatada shacbiga Soomaaliyeed ee tabaaleysan, dib u soo nooleynta dagaalada sokeeye iyo waxyeeleynta degenaanshaha geeska Afrika.

 

·          Golaha DDS wuxuu u xaqiijinayaa shacbiga Soomaaliyeed in uu ku taagnaan doono wadada nabadda, dib u heshiisiinta iyo abaabul dhismo dawlad qaran oo metesha ummadda Soomaaliyeed, xurmeynsan deegaanada wadanka oo idil.

 

·          Goluhu markuu darsey mawqifka colaadeed ee Dawladda Jabuuti iyo fara gelinta ay ku hayaan guud ahaan arrimaha Soomaaliyeed, gaar ahaan caburinta bareerka ah ay kula kaceen (Somaliland) dhowaan, wuxuuna Goluhu DDS dusha uga ridayaa cambaarayn kulul Dawladda Jabuuti, wixii dhibaato ah oo halkaas ka dhacana Dawladda Jabuuti ayaa dusha u ridan doonta.

 

BAAQ

 

 

·          Golaha DDS wuxuu ugu baaqayaa bulshada Soomaaliyeed inay adkeeyaan midnimadooda iyo walaaltinimadooda kana digtoonaadaan dibindaabyada kooxda Carte ee lagula wareegayo hantidooda, laguna dhaawacayo mustaqbalka ubadkooda.

 

·          Sidoo kale wuxuu Goluhu ugu baaqayaa dawladaha iyo hay'adaha deeq bixiyayaasha inaysan kaalmo u fidin kooxda Carte.

 

·          Dawladaha Sacuudiga iyo Masar waxaa si adag looga codsanayaa in ay ka waantoobaan garab istaaga kooxda Carte oo ku hawlan dib u soo nooleynta dagaalada sokeeye. 

 

 

Xoghayaha Warfaafinta GDDS

Dr. Maxamed Diiriye Cilmi