http://www.jamhuriya.com/

CABDI QAASIM OO KU HANJABAY IN UU SOMALILAND KU SOO XERA GELLIN DOONO DAGAAL

by Jamhuriya Newspaper

Maddaxweynaha Djibuuti loogu doortay Soomaaliya Cabdi Qaasim Salaan Xasan ayaa ku hanjabay hadii ay ka fursan weydo dagaal in uu ku soo xero geli doono gobolada goonida u goay ee Dalkii la odhan jiray Soomaaliya .

Cabdi Qaasim oo tagay magaalada Qaahira si uu uga hadlo furitaanka shirka jaamacada carabta oo manta ka furmaya halkaas, wuxuu ku sheegsy faalo lagu daabacay wargaysyada dalkaas sabtidii shalay, in aan ka aqoon sanayn gobolada goonida isu taagay ee Soomaaliya, balse uu ugu horayn ku dayi doono wada xaajood si uu dalka u mideeyo. Waxaana uu intaa raaciyey oo ku hanjabay in uu ugu dambayn qaadi doono dagaal, kaasoo noqon doona ayuu yidhi talaabada u dambaysa ee soo celinta midnimada.

JANARAL GAANI OO KU ADKAYSTAY IN UU GEYSTAY XASUUQII GOBOLADA WAQOOYI

Janaraal Maxamed Xaashi Gaani oo ahaa tali yihii qaybta 26tanaad ee ciidankii Siyaad Bare kana masuul ahaa xasuuqii gobolada waqooyi 1980-1986 ayaa sheegay in uu ahaa askari dalkiisa ka difaacaayey dhaqdhaqaaqii jabhada SNM oo ay dawlada Itoobiya taageeraysay.

Janaraal Gaani oo haatan xubin ka ah baarlamaanka cusub ee Soomaaliya ee Carta lagu soo dhisay, wakaalada wararka ee qaramada midoobay IRIN wuxuu u sheegay in aanu isu arag dambiile dagaal xuquuqda aadamahana markay noqotana uu ahaa askari dalkiisa ka difaacaayey dhaqdhaqaas ay taageeraysay Itoobiya, waxaanu yidhi cidkasta oo lagu eedaynaayo dambigaas waxaa la soo taagi karaa maxkamad taasina waxay u taalaa dawlada Soomaaliya.