19 May 2007 04:29

SOMALIA WATCH
 
Country
  • Title: [SW Country]( Garowe - PL) Aftida Cigaal Waxba kama jiraan - War-Saxaafadeed ka soo baxay Shirka Golaha Isimada
  • Posted by/on:[AAJ][20 June 2001]

 

 

DAWLAD GOBOLEEDKA PUNTLAND EE SOOMAALIYA

SHIRKA GOLAHA ISIMADA

Garoowe, Juun 16, 2001

 

Ku:  Xoghayaha Guud ee Qaramada Midoobay,   N.Y. USA 

  "            Wakiilka Xoghayaha Guud ee Qaramada Midoobey ee Soomaaliya,  Mr. David Stephen

  "         IGAD

  "         Ururka Jaamacadda Carabta

  "         Ururka Islaamka (OIC)

  "         Ururka Midowga Afrika (OAU)

  "         Ururka Midowga Yurub (EU)

  "        Dawladaha Daneeya Arrimaha Soomaaliya

  "       Jaaliyadaha Soomaaliyeed ee Dibedda

 

Ujeeddo:            Bayaan Aayo-masiireed 

Sida la wada ogsoon yahay, dalka soomaaliya waxaa ka dhacay 1991kii dagaallo sokeeye oo qabiilaysan, oo dhumuc, dherer, dhimasho, dhaawac iyo dhacba lahaa, kalifeyna in beelihii kala qaxaan, qof walibana ku tubbado beeshiisii degaan ee abtirsiimo oday, is aaminid iyo isku kalsooni la'aan darteed. 

Sidaa awgeed, abuuritaankii Puntland waxay ku salaysnayd aragtidaas ah, isir-wadaagnimada reereed, oo marxalad wakhtiyeedka kala guur lagama maammaan u ah damaanad qaadista nabadgelyada ku noolaanshaha beeleed; gun-dhigna u ah aragti falsafadeedka dhisidda Federaalka Soomaaliyeed ee mustaqbal oo ah hoos ka unug, kor u dhis (From botton up approach). 

Haddaba, go'aan maxkamadeedkii ka soo baxay maamulka Maxamed Ibraahim Cigaal ee isku magacaaba Somaliland, 13 Juun, 2001 oo ku saabsanaa in 97% bulshadu u codaysay Dastuurkii kala go'a Soomaaliyeed ee gooni isu taagga iyo gaar isu maamulidda Gobollada Waqooyi-galbeed ee laga baahiyey BBC-da; ayaa Dawlad Goboleedka Puntland, Isimada iyo shacbi weynaha Puntland andaco ka qabaan, iyagoo u arka been-abuur iyo majara habaabin siyaaso.  

Arrintaas waxa bar-tilmaameed caddayneed u ah qodobada hoos ku qoran: - 

Ugu Horayn: 1998kii, beelaha Isir-wadaagta Harti Galbeed ee deggan Gobollada Sool, Sanaag iyo Degmada Buuhoodle (Togdheer), iyagoo ay hoggaaminayaan Isimadooda kala ah: - 

  1. Garaad Cabdiqani Garaad Jaamac                         Dhulbahante
  2. Garaad Saleebaan Garaad Maxamed                                        "         
  3. Ugaas Cabdullaahi Ciise Nuur                                    "         
  4. Garaad Abshir Saalac Maxamed                                        "         
  5. Garaad Cabdullaahi Garaad Soofe                                   "          
  6. Suldaan Saciid Cismaan Cali                                               "         
  7. Suldaan Saciid Suldaan C/salaan M. Cali Shire            Warsangali
  8. Garaad Cabdullaahi Cali Ciid                                                  "         
  9. Islaan Xuseen X. C/salaan                                                      "         
  10. Ugaas Maxamed Saciid Ugaas                           Tiinle
  11. Amiir Ismaaciil Suldaan Maxamuud                               Warsangali  

Waxay laf dhabar u noqdeen oo dhidibada u aaseen jiritaanka Dawlad Goboleedka Puntland; iyagoo ka qayb qaatay shir-weynihii aayo ka talinta masirka Ummaddeed ee Garoowe, Mey 15, ilaa Ogoosto 1, 1998kii, isla markaana ansixiyeen axdiga iyo dhismihii maamul Dawladeedka Puntland. 

Waxa Kaloo Daliil Cad ah: Guddigii caalamiga ahaa ee xaqiiqo raadinta (International Fact Finding Committee) ee isugu jirey IGAD, UN, EU, OAU, Arab League, OIC iyo Dawladaha daneeya arrinta Soomaaliya, sida: Talyaaniga, USA, UK, Masar, Liibiya, Ethiopia, Yemen IWM, oo Isimada kor ku xusan ee beelahaasi u cadeeyeen ka mid noqoshadooda buuxda ee Puntland, markii ay shir kula yeesheen Garoowe, 1999kii, Guddigaas oo war bixintoodii ku faafiyey adduun-weynaha; taasoo bartil-maameed u ahayd in beelaha Harti ee Gobollada Sool, Sanaag iyo Degaanka Buuhoodle ee Gobolka Togdheer ka madax bannaanaadeen Maamulka Cigaal ee waqooyi-Galbeed, kana mid noqdeen Dawlad Goboleedka Puntland, iyagoo ku sugaya midnimo Soomaaliyeed oo leh Dawlad Dhexe oo Federaali ah, kana soo horjeeda kala go'a dalka Soomaaliya. 

Daliilka Sadexaad: Shir ay ku yeesheen Laas-caanood, 27-29/05/2001, Isimada Dhulbahante ee kala ah: 

  1. Garaad Cabdiqani Garaad Jaamac.
  2. Garaad Saleebaan Garaad Maxamed.
  3. Garaad Ismaaciil Ducaale
  4. Ugaas Cabdullaahi Ciise Nuur iyo
  5. Suldaan Saciid Cismaan Cali.

Waxay go'aan sadeen inaan marnaba sanaadiiq xambaarsan Afti u qaadista Dastuurka kala qaybinta Soomaaliyeed la keeni karin dhulka Sool, Sanaag iyo Buuhoodle ee shacbiga Dhulbahante, waxayna toos arrintaas ugala xaajoodeen islana aqbaleen Maxamed Ibraahim Cigaal, isagoo Wasiirkiisa Arrimaha Dibedduna goob joog ahaa, sidii laga baahiyey Idaacadda BBC-da. 

Daliilka Afraad: Garaad Cabdiqani Garaad Jaamac, Garaad Saleebaan Garaad Maxamed iyo Garaad Cabdullaahi Cali Ciid oo ku hadlaya magaca Beelaha Dhulbahante iyo Warsangali, waxay goonni goonni dabayaaqadii bishii Mey ee 2001, warbaahinta BBC-da iyo saxaafadda gudahaba uga caddeeyeen in afti u qaadista kala go'a Soomaaliya ee uu wado Maxamed Ibraahim Cigaal aaney haba yareetee khuseyn, aadna ay uga soo horjeedaan shucuubta Harti ee degaamada Sool, Sanaag iyo Buuhoodle. 

Daliilka Shanaad: Maalinta taariikhdu ahayd 31/05/2001, oo ku qoondaysnayd afti u qaadis ku sheegta Dastuurka Cigaal, waxa tagey magaalada Laas-caanood Weriyaha BBC-da ee Puntland iyo saxaafado Madax bannaan; waxayna caddeeyeen, kana sii daayeen BBC-da lafteeda, xaqiiqada ah in dhammaanba shacbiga Gobollada Sool, Sanaag iyo Buuhoodle, oo ay Tuulo Tuulo ula xidhiidheen ay qaadeceen aftidaas. 

Daliilka Lixaad: Isla maalintaas, 31/05/2001, waxa shakhsiyaad calooshooda u shaqaystayaal ahi isku dayeen iney meelo ka mid ah degaamada Sool si tuugo ah ku soo geliyaan, 15 sanduuq oo ah kuwa Cigaal ku andacoonayo in cod-bixin lagu qaaday. Hase yeeshee, dadweynaha iyo Maamulka Puntland oo feejignaan iyo is-xilqaan dheeraad ah muujiyey ayaa dhammaantood soo qab qabtay; kuwaasoo maanta, yaalla laguna arki karo magaalooyinka Laas-caanood iyo Xarunta Dawlad Goboleedka Puntland ee Garoowe. 

Daliilka Todobaad: Sidoo kale, bulsho weynta iyo Hoggaamiye dhaqameedyada Harti ee Gobolka Sanaag, si wadajir wadareed ah ayey uga gil gisheen, isuna hortaageen, afti ku sheeggii Maamulka Cigaal ee ku salaysnayd kala go'a Soomaaliya; iyagoo sanaadiiqdii doorasho iyo xubnihii siteyba 30kii Mey, 2001 ku go'doomiyey, kuna hor taagnaa guri ku yaalla Tuulada Hadaaftimo ilaa 5tii Juun, 2001. 

Hawl galkaasna waxaa ku dhintay naftii hure ka tirsanaa Ciidanka Bol/Daraawiish ee Puntland, waxaana isla markaas ku dhaawacmay 3 qof oo shcbi ah, taasoo hoga tusaale markhaatiyeed u ah inaan haba yaraatee wax cod bixin ahi ka dhicin qaybta Hartiga ee Gobolka Sanaag oo ay ku jirto magaalada Ceerigaabo. 

GEBEGABO: 

Sida ku cad qodobada kor ku xusan, waxaannu Beesha Caalamka Hay'adaha Calaamiga ah, ururka Goboleedyada, Dawladaha daneeya Arrinta Soomaaliya iyo shacbiga Soomaaliyeed gudo iyo dibedba daaha uga qaadaynaa oo aanu gaarsiinaynaa in sheegashada Maamulka Waqooyi-Galbeed ee Maxamed X. Ibraahim Cigaal ee ah in uu afti Dastuur ka qaaday Gobollada Harti ee Sool, Sanaag iyo deegaanka Buuhoodle tahay bar kuma taal, wax kama jiraan ah. 

Sidaa awgeed, Hay'adaha Caalamiga ah waxa laga codsanayaa in ay tixgeliyaan kuna dhaqmaan rabitaanka iyo go'aansiga Masiir ee Dadweynaha Beesha Harti ee Sool, Sanaag iyo Buuhoodle ee ah, ka mid noqoshada buuxda ee Puntland. 

ISIMADA SAXIIXAY: 

  1. Garaad Cabdiqani Garaad Jaamac (Wakiil)           _____________            ____________
  2. Garaad Saleebaan Garaad Maxamed (Wakiil) _____________            ____________
  3. Boqor Cali Garaad Maxamuud C/Shire            _____________            ____________
  4. Garaad Cabdullaahi Cali Ciid                              _____________            ____________
  5. Suldaan Cabdullaahi Cartan X. Faarax            _____________            ____________
  6. Ugaas Cabdullaahi Ciise Nuur (Wakiil)            _____________            ____________
  7. Islaan Xuseen X. Cabdisalaan                            _____________            ____________
  8. Garaad Cabdullaahi Garaad Soofe (Wakiil)            _____________            ____________
  9. Ugaas Maxamed Ugaas Saciid Ugaas               _____________            ____________
  10. Suldaan Xasan Cali Jibriil                            _____________            ____________
  11. Suldaan Saciid Cismaan (Wakiil)                       _____________            ____________
  12. Ugaas Bashiir Cabdi Ciise                             _____________            ____________
  13. Diiriye Maxame Cali (Wakiilka)
  14. Garaad Abshir Saalax Maxamed                    _____________            ____________
  15. Amiir Ismaaciil Suldaan Maxamuud                   _____________            ____________
  16. Suldaan Cali Ismaaciil Cali                            _____________            ____________
  17. Ugaas Ibraahim Cali Shire                            _____________            ____________
  18. Boqor Cabdullaahi Axmed Cali                  _____________            ____________
  19. Garaad Cali Buraale Xasan (Wakiil)                       _____________            ____________
  20. Garaad Ismaaciil Ducaale (Wakiil)                       _____________            ____________                       

 

[Country]

Copyright © 1999 by somaliawatch.org.  All Rights Reserved.  Revised:  19 May 2007 05:16 AM. Webmaster HomePage