Ururka HIRDA, (Himilo Relief Rehabilitation and Development Association) waa urur samafal ah oo ujeedadiisu tahay in uu ka qayb qaato howlaha samafalka ah ee ka socda Soomaaliya gaar ahaan Gobollada Gedo, Jubbada Hoose iyo Galgaduud. Ururkani waxaa uu howl dhinaca waxbarashada ah ka wadaa Degmada Bardere, Gobolka Gedo.

Dugsiga Hoose dhexe ee Bardere oo hoos yimaada HIRDA waa dugsiga kaliya ee ka jira degmadaas oo ay ku nool yihiin qiyaastii dad gaaraya 70,000 oo qof. Sanaddugsiyeedka 1999/2000 waxaa imtixaanka u fariistay carruur tiradoodu gaarayso 312 arday. Ururkan HIRDA oo illaa iyo hadda ku tiirsan dhaqaale ahaan jaaliyadda Soomaaliyeed ee u dhashay asal ahaan degaanada uu ururkani ka howlgalo ee kor ku xusan, isagaas oo kaliya ayaa ka jira degmadaas wax urur ah oo ku howlan waxbarashada. Haseyeeshee Gobolka intiisa kale marka laga reebo Luuq waxaa dhinaca waxbarashada ka taageera ururro caalami ah oo kala ah TROCARE iyo NCA.

Sanadadii 1998iyo 1999 waxaa uu ururku ku howlanaa wacyi galinta Jaaliyadda si ay uga qayb qaataan howlaha samafalka. Sanadkan 2000 ururku waxaa uu ku tallaabsaday in uu xiriir iskaashi ka raadiyo ururrada caalamiga ah, waxaana noo suurta gashay in aan gayno Gobolka ururka NOVIB wakiil ka socda si uu u soo arko xaaladda dhabta ah ee ka jirta Gobolka kaddib markii ay soo mareen degmooyinka Bardere, Burdhubo, garbahaarey iyo Baled xaawo.

Waxaan diyaarinnay Daraasad (Project proposal) suurta galinya in aan helno kaalmo ka baxsan tan Jaaliyadda. Waxaana farxad noo ah in aan idiin soo gudbinno in hayaddii tagtay Gedo, kaddib markay arkeen dadaalka aan samaynay waxay ogolaadeen in ay na dhex marto wadashaqayn joogto ah (partnership). Sidaas darteed waxaan rajaynaynaa in aan mustaqbalka wadajir u fulinno mashaariic waxtar u leh bulshada dhibaataysan ee ku dhaqan Gobolladaas. Arrimahaas waxaa suurta galiyey Deeqda ay jaaliyadda bixiso iyo dadaalka guddiga fulinta iyo xubnaha HIRDA ee ka howlgala gudaha dalka.

Guddiga fulinta ee Ururka HIRDA waxaa uu isku howlay sanadkan aan ku jirno in uu xiriir la yeesho hayadaha samafalka ee ka jira wadanka Holland. Ugu horreyntii waxaan diyaarinnay daraasad mashruuc (Project proposal) kaas oo aan u gudbinnay dhow hayadood, waxaana isla markii arrinta xiiseeyey hayadda NOVIB oo ka mid ahayd hayadihii qaybta ka qaatay safakii sanadkii hore uu ururkani ku tagay Gedo kaas oo lagu soo dhisay Dugsiga Hoose Dhexe Bardere, waxaa kaloo safarkaas lagu soo ururiyey xogta loo baahan yahay si loo qoro daraasadda mashruuca.

Hayadda NOVIB iyo ururka HIRDA waxaa ay wada yeesheen dhowr shir iyo wadahaddalo ku saabsan iskaashiga labada urur. Wadahadalladaasna waxaa ka soo baxay in ay lagama maarmaan tahay in ay hayaddani marka hore soo aragto xaaladda dhabta ah ee ka jirta Gobolka Gedo iyo dugsiga aan gacanta ku hayno.

Ujeeddada safarka waxaa ugu waynaa arrimaha hoos ku qoran: In hayadda NOVIB ay indhaheeda ku soo aragto waxyaabaha aan qoraalka ku sheegnay ee ku saabsan Dugsiga hoose dhexe ee Bardere iyo xaaladda Gobolka. In laga qaybgalo xafladda xiritaanka sanad dugsiyeedka Dugsiga Hoose dhexe ee Bardere. In labada urur ay isla soo arkaan dhinacyada ay iska kaashan karaan. In la soo arko sida loo horumarin karo manhajka dugsiga iyo tababarka macallimiinta In la sameeyo abaabul ku wajahan dumarka si loo diyaariyo mustaqbalka mashaariic la xiriirta horumarinta xaaladda dumarka Gedo gaar ahaan Bardere.

Dhinaca dhibaatooyinka biyaha la xiriira waxaa la samaynayey sahan ku saabsan helitaan biyo nadiif ah iyadoo sample( Ciid iyo Biyaha) laga soo qaaday Bardere si loogu baaro Shaybaar ku yaal Holland. Waxaa wadahadallo ku saabsan iskaashiga Ururka HIRDA iyo Ururrrada ay ka mid yihiin UNICEF, UNESCO, NCA, Horn Relif iyo ERA int ay ka dhaceen magaalada Nairobi oo xarun u ah ururradaas.

Haddaba si ujeeddadaas u hirgasho waxaa ka qayb qaatay safarka xubnaha hoos ku qoran kuwaas oo midwalbaa fulinayey howl loo asteeyey oo u gaar ah marka laga reebo howsha guud. Waxaana ka mid ahaa xubnahaas

Madalina Florea (NOVIB qaybta waxbarashada ahna ARDmundi projectleider) Waxaa ay u xilsaarnayd in ay soo hubiso xaaladda dhabta ah ee Gobolka islamarkaana ay sahmiso in xiriir iskaashi dhex mari karo HIRDA iyo NOVIB.

Abdi Mahamed Baffo (NOVIB Consulting) waa wakiil u qaabilsan Novib arrimaha Mashaariicda ka socda Somaliya, waxaa uu ka mid ahaa wafdiga isagoo ka sii raacay Nairobi. Waxaa uu qayb wayn ka qaatay fududaynta howlaha safarka iyo la talinta Novib waliba waxaa uu door ka ciyaaray xallinta mashaakilaadka ka jira gudaha dalka.

Mahamud Tarey (Guddiga Fulinta HIRDA) waxaa uu u xilsaarnaa in uu soo hubiyo habsami u socodka howlaha ururka, xalliyo waxii mashaakilaad ah ee imaan kara isla markaana uu soo tuso NOVIB baahida dhabta ah ee ka jirta Gobolka. Waxaa kale oo uu ka qaybqaadanayey wadahadallada hayadaha kale si iskaashi u dhexmaro hayadahaas iyo Hirda.

Mohamed Ibrahim: (Xubnaha Ururka HIRDA) waxaa uu u xilsaarnaa in uu soo arko waxa lagu qabtay deeqdii ay bixiyeen xubnaha ururka Hirda. Maadaama uu yahay nin oday ah waxaa uu ka qayb qaatay xallinta mashaakilaadka Degmada Bardere. Isagoo laga faa'idaysanaayo aqoontiisa dhinaca Geologia-da ah (Macdanta iyo Biyaha) waxaan u dirnay sahanka helitaanka biyo nadiif ah iyo in uu soo qaado sample (ccid iyo Biyo ) si loogu sameeyo baaritaan.

Xamsa Sheikh Xuseen (Hanoolaato) waxaa ay ka mid tahay dumarka reer Holland ah waana qof aad ugu firfircoon abaabulka maadaama ay muddo badan ka soo shaqaynaysay howlahaas, waxaa loo xilsaaray in ay abaabusho dumarka Degmada Bardere si ay uga qayb qaataan howlaha horumarinta una samaysan lahaayeen urur haween sida gobollada dalka. Waxaa kaloo loo xilsaaray in ay sahmiso habka loo caawini karo dumarka. Sidoo kale waxaa ay kala hadlaysay dumarka sidii ay gabdhahoda ugu soo diri lahaayeen waxbarashada.