Inj. Muunye "Anigu waxaan hayaa afar markab oo ay Soomaaliya

leedahay, waxaase isweydiin mudan halkaaii ay ka baxeen markabkii Booli Moog,

diyaaradihii Somali Airlines iyo warshadihii dalka"

BAYDHABO, Sabti:

Inj. Muunye Saciid Cumar oo ah ninka gacanta ku haya qaar ka mid ah maraakiibtii Soomaaliya,

haatanna siyaasadda kooxaha Soomaaliya ku lug leh ayaa sheegay in aanay waxba ka jirin

eedaymaha markasta loo soo jeediyo ee sheega inuu hanti badan lunsaday.

Inj. Muunye oo u waramay Weriyaha QARAN dhawaan isagoo jooga magaalada Baydhabo ayaa

iska difaacay dambiyada la leeyahay wuu ku kacay, "anigu waxaan hayaa 4 markab oo Soomaaliya

leedahay oo ah hanti Qaran maalintii dowladi dalka ka dhalatana, waan wareejinayaa inta ka

horeysase mana jirto cid aan ku aamini karo" ayuu yiri "waata aniga la I eedayee halkee ayey

mareen markabkii Booli Moog, diyaaradihii Somali Airlines, warshadihii dalka iyo weliba

lacagihii ku jiray bankiyada dibadda ee uu Qaranku lahaa".

Inj. Muunye waxa uu sheegay inay dibadaha wareegayaan dad uu ku tilmaamay inay iibsadeen

warshadihii dalka sida warshadii sokorta ee Mareereey, waxaa kuwaasi ka sii daran ayuu yiri

kuwa maalin kasta la soo heshiiya dowladaha waaweyn ee horumaray oo baddaha Soomaaliya

ku shuba haraadiga sunta Warshadaha.

Inj. Muunye oo la waydiiyey sababta uu xilligan ugu lug yeeshay siyaasadda kooxaha

ee Soomaaliya ayaa sheegay inuu sidaasi go’aansaday, kaddib markii sida uu sheegay uu arkay 10 sano kaddib dhibaatada sii baahaysa ee dalka ka jirta, "kuwii dhibaatada gaystay ayaa doonaya inay dalka wax ka noqdaan ee maxaa aniga ii diidaya" ayuu yiri Inj. Muunye

(QARAN PRESS)