RAG AY KU JIRAAN CABDULLAAHI BOQOR IYO XASAN ABSHIR OO
MADAX LOOGA DHIGAY GUDIYADA NADAAFADDA MUQDISHO.

Sahan, Muqdisho.
2001-01-29

Xubno ay ka mid yihiin Wasiirka Gaashaandhigga dawladda ku meelgaarka ah ee Muqdisho C/laahi Boqor Muuse, Xasan Abshir Faarax oo isna ah Wasiirka wasaaradda Macdanta iyo Biyaha ee dawladaas, wasiir ku xigeenka wasaaradda waxbarashada Axmed Maxamed Bide iyo qaar kale oo kale oo ka mid ah wasiiradda iyo xildhibaanada dawladda ku meelgaarka ah ee ay dhiseen Madaxweyne Ismaaciil Cumar Geelle iyo David Stephen ayaa Loo xilsaaray in ay hawlaha nadaafadda iyo amniga kala shaqeeyaan masuuliyiinta Gobolka Banaadir.

Wareegto rasmi ah oo uu Sabtidii soo saaray Madaxweyne C/qaasim Salaad ayaa masuuliyadaas loogu xulay wasiiradda in ay wax ka fuliyaan, iydoo ay hawshani qayb ka tahay olole nadaafadeed oo ay dawladda ku meelgaarka ah ee Carte kaga shaqaynayso jidadka magaalada Muqdisho.

C/laahi Boqor waxaa todobaadkii hore lagu khasbay in uu beeniyo war uu ka sii daayay arbacadii Idaacada HornAfrik oo ah idaacad si aad ah u taageerta dawladda cusub, warkaas uu idaacadda ka sii daayay wasiirku waxa uu sheegayay in aysan jirin wax weerar ah oo ay Itoobiya ku hayso soomaaliya iyo wax dhib ah oo ay u geysatay Soomaalida, hase ahaatee waxa dhakafaar ku noqotay saxaafadda madaxa banaan ee Muqdisho markii Wasiirku subaxnimadii khamiista iska soo dhex galay kulan ay wada lahaayeen wasaaradda Warfaafinta ee dawladaas iyo saxaafadda Muqdisho, halkaas oo wasiirka gaashaandhigu ku soo bandhigay war beeninaya hadal uu habeenkii maaalintaas ka jeediyay idaacadda HornAfrik, wuxuuna wasiirku ku cududaartay in uusan war hayn markii hore hadase loo waramay, hase ahaatee warar xog ogaal ahi waxa ay sheegayaan in C/qaasim Salaad ku khasbay C/laahi Boqor in uu beeniyo hadalkiisii ama in uu is casilo.

Cabdullaahi Boqor oo ka hadlayay shirkaas beenintuna waxa uu si aad ah u weeraray masuuliyiinta ku shiraysa Ceel Barde oo uu ku tilmaamay dabadhilifyo Amxaaro. Masuuliyiinta macaga Buntilaan kaga qayb galay shirka Carte ayaa waxa ay ku guul daraysteen in ay ka baajiyaan ciidan, hub iyo sahay C/qaasim u diaray magaalada Kismaayo si looga hor tago ciidamada is bahaysiga ay C/qaasim bah wadaagta yihiin ee xoogga halkaas ku haysta oo laga soo saaro, waxayna taasi dhaawac weyn u geysatay xushmadii ay ku lahaayeen Buntilaan, waxa kale oo uu Wasiirka Gaashaandhigu qirtay in uusan waxba ka ogeyn dagaalkii Balcad dawladda kmg ahi ku qaaday, isadoo isla mar ahaantaana janankii dagaalkaas hogaaminayay jaranaal Galaal loo diray wafti kaligiis ah dalka Ruushka halkii laga filayay in isaga ama wasiirka mid is casilo.