| Column |
|
- [SW Column] (Courtesy of Yamayska.com)
Warbixin: Dr. Dasuuqi, Siyaasadda Ururka & Saldhigga Cusub :Posted on
Dec 20, 2002
|
Opinions expressed in this column
are those of the contributors and not necessarily those of SW.
Warbixin: Dr.
Dasuuqi, Siyaasadda Ururka & Saldhigga Cusub
______________
Dhaqdhaqaaq Siyaasadeed & Mid
Milatari oo ka Bilowday Xamar iyo Eldoret
______________________________
Gaalkacyo - 19 Diseenber 2002 (Yamayska)
- Kusimaha madaxa urur
siyaasadeedka al-Itixaad ee Bariga Afrika, Dr. Dasuuqi - isla markaana ah
xildhibaan kooxda CARTA, oo bilahaan saldhig ka dhigtay madasha shirka
dib-u-heshiisiinta, Eldoret - ayaa indhawaalaba wuxuu ku mushquulsanaa
dib-u-habaynta siyaasadda Ururka, kobcinta xiriirka Ururka, dib-u-dhiska
dhaqaale iyo waliba raadinta taageero dhaqaale iyo mid siyaasadeedba.
Dhakhtarka oo badanaa waqtigiisa ku dhameeya shirar aan loo kala-kicin
habeen iyo maalin, ayaa haddana waxaad ku arkaysaa bannaanka Hotel
Siriwika asagoo sida musharixii markasta salaamaya dadka soo galaya iyo
kuwa ka baxaya hoteelka. Waxaad dareemaysaa in salaantu aysan macna la'aan
ahayn, oo qofkii salaan kula raaga Dhakhtarka, habeenkii haddaad meel kale
ka weydid, waxaad ka helaysaa guriga Dr. Dasuuqi. Intaas kaliya ma ahee,
waxaa baryahaan sii badanaya hogaamiyayaasha si toos ah iyo si dadbanba
isugu dhiibaya aragtida ku-simaha Ururka, Dr. Dasuuqi.
Hadaba su'aashu waa: waa maxay ajendaha Dr. Dasuuqi iyo tan Ururka ee
Eldoret? Dr. Dasuuqi yuu matalaa, yaa maamula Dhakhtarka, yaase lacageeya?
Jawaabuhu ma wada sugna, maamulka ururkuna ma cadda oo badanaa dad yar
ayaa ka war haya, laakiin illaa xad ma qarsoona qorshaha Ururku, lagana
soo bilaabo shirkii CARTA, ajendaha ugu horeeya ee Ururku wuxuu ahaa inuu
qabto majaraha siyaasadda Soomaaliya, haddusan qabanna, si kalsooniyi ku
dheehantahay, uu cid kale ugu dhiibo.
Nasiib wanaag amaba nasiib darro, hadba say kula tahay, ajendihii Ururka
ee CARTA waa dhicisoobay, ayadoo dhanna Eldoret baa lagu aasay. Si kastaba
ha ahaatee, dhib kastana - haba ugu horayso tan la dagaalanka argagixisada
- ha soo food-saarto Ururku, haddana marna ma uusan kala daadan Ururku.
Waxaaba la dhihi karaa, xag dhaqaale mooyee, xag siyaasadeed, la
dagaalanka argagixisadu ugamaba darin Ururka.
Dhaktarka oo asxaabtiisa ay ka mid yihiin Shiikh Cumar Faaruuq, oo hadda
aan Xamar ka bixin, iyo Shiikh Maxamed Abdiraxmaan Kaariye, oo Oregon,
USA, ku xiran, arrimo la xiriira la dagaalanka argagixisada, iyo Kor.
Daahir Aweys oo wali la la'yahay, kuna jira liiska Cusama Bin Ladan,
waxay ka mid ahaayeen tiirarka Ururka, qaarkoodna waxayba ku jireen golaha
wakiilada kooxda Carta ee iskood isu soo magacaabay tan iyo markii ay
kooxdu isa soo dhistay bartamihii 2000. Waxay kaloo saddexduba kamid
yahiin xubnaha sar-sare ee urur diineedka Al-Itixaad. Badanaa
hogaamiyaayasha Ururka, inta la soo masaafuriyey mooyee (Sh. Cumar Faaruuq),
ama inta xir-xiran (Sh. Kaariye), badanaa intii kale ama dagaal bay ku
dhinteen, amaba waa la raadinayaa oo magacyadoodu waxay ka dhex-muuqdaan
liiskii dadkii lagu xiriiriyay argagixisada adduunka, ayna baahiyeen
dawladaha safka hore uga jira la dagaalanka argagixisada.
Dhibkaas jira awgiis, badanaa maamulkii ururka ee awal is qarin-jiray,
sida Dhaktar Dasuuqi, waxaa khasab maanta noqotay, si ay u difaacaan
jiritaanka Ururka, inay safka hore soo istaagaan. Hadaba maxaa ka mid ah
ajendayaasha Dhaktarka iyo tan Ururka ee maanta khasabtay inay safka hore
soo istaagaan?
Shirka Dib-u-heshiisiinta Edloret waa mid maanta rajo wayn galiyay
shacabka Soomalida, badanaa hogaamiyayaashooda iyo maamul goboleedyada u
doodaya habka federaalka, haba ugu horayso DGPL (Puntland); laakiin hadana
waa mid rajo la'aan ku abuuray Ururka iyo taageerayaashiisa meel kastaba
ha joogeene. Maanta oo Ururku jeclaan lahaa in Cabdiqaasim Salaad Xasan uu
safka hore, si qarsoodi ah, ugu fadhiyo ururka, way suurtoobi wayday
siyaabo badan awgood. Hadaba arrini waxay ka fursan wayday in lala
dagaalamo shakhsiyaadka iyo maamulada sababay in Ururku curyaamo.
Maamulada lala dagaalamayo waxaa ugu horeeya DGPL (Puntland) iyo
madaxwaynahoodu, Mudane Cabdullahi Yusuf Axmed. Dagaalkii ugu horeeyay ee
lala beegsaday DGPL, uuna hugaaminayay Dr. Yusuf Xaaji Nuur, uuna uga
danbeeyay Jaamac Cali Jaamac waa uu fashilmay; laakiin marnaba inuu
dhamaado waxaa diiday ururka, ayagoo ku dhiirri-galinaya Jaamac Cali
Jaamac, oo kamid ah tiirarka ururka, inuu sii wado dagaalka.
Ururku wuxuu diyaariyay ciidamo gaaraya illa 300 oo wiil oo sii saacida
ciidamo beeleedka aagga, laguna yiri diintaad amxaaro iyo Maraykan ka
difaacaysaan. Intaas kaliya maahee, Ururku waxay waddanka Kanada ka
keeneen Gen. Cadde Muuse, oo hadda haysta dhalasho Kanadiyaan, waddanka ka
maqnaa dagaalkii sokeeye oo dhan iyo wixii ka danbeeyay. Generaal Cadde
Muuse wuxuu ka soo dagay Hargeysa; raggiisii dagaalkii hore ku jabayna
wuxuu ka soo uruursaday Burco. Intuu Burco ku negaa Generaalku wuxuu hal
asbuuc la shirayay maamulka la magax-baxay Soomali-land, halkaas wuxuu uga
sii gudbay gobolka Sanaag. Generaalka iyo taageerayaashiisu hadda waxay ku
suganyihiin aagga Dhuudo, ayagoo dagaal labaad u diyaar-garoobaya.
Dagaalkaas oo galay qaybtiisii labaad.
Qaybtii labaad ee la dagaalanka DGPL waxaa Eldoret ka daadihinaya Dr.
Dasuuqi. Warar lugu kalsoonyahay, Yamayskuna indhawaalaba daba joogay,
ayaa tibaaxaya in Ururka, shakhsiyaadka, ganacsatada iyo wadamada uu
xiriirka dhow la leeyahayba ay diyariyeen lacag ku dhow $400,000 oo
doolarka Maraykanka ah. Lacagtaas oo laba qaybood loo kala qaybiyay.
Waa qaybta horee, in taakulayn loo siiyo maleeshiyada Kor. Jaamac Cali
Jaamac, ee uu hogaaminayo Gen. Cadde Muuse, kuna sugan aagga Dhuudo.
Taakulayntaas ayaa isugu jidha hub, saanad, lacag iyo raashin. Lacagtaas
oo badankeeda asbuucyadii danbe laga xawiley magaalada Nayroobi, ayaa loo
kala diray Xamar, Hargeysa, Burco iyo Jabuuti. Warar kale ayaa tibaaxaya
in badanaa qaybtii hubka mar hore la gaday, wixii la diray mooyee, intii
danbana hadda loo diyaariyey ambabixin.
Waa qaybta danbee, in la diyaariyo, soo noqoshada Madaxweynaha DGPL ka
dib, barnaamij looga takhallusayo Mudane Cabdullahi Yusuf Axmed.
Barnaamijkan oo qaybtiise hore ay fashilantay wajigii hore ee shirka, ka
dib markii sirdoonka Keenyaatigu ka war helay qorshahaas. Qaybta labaad
ayuu Ururku rajaynayaa uuna qorshaynayaa inay ka fadudaato isku daygii
hore.
Warar kale oo Yamaysku ka helay ilo u dhow-dhow booliiska Kenya ayaa
tibaaxaya inuu jiro tuhun isa soo taraya, badanaana ah kan lagu helo
isticmaalka teknoolajiyada cusub, kaasoo ah in Edloret ay noqotay goob
laga hogaamiyo argagixisada Mombasa.
Dib-u-habaynta Ururka, hoggaanka Dr. Dasuuqi, falalka argagixisada bariga
Afrika iyo socdaalka iyo daba-jooga sirdoonka Keenya, Ameerika iyo kan
Itoobiya, ayaa waxay ku soo aadeen waqti xasaasi ah; waqti uu Wasiirka
Difaaca Maraykanku u sheegay cidamadiisa ku sugan geeska Afrika inay u
diyaar-garoobaan hawl-gal cusub ee dhanka geeska.
Hadaba su'aashu waxay tahay: maxaa isku aadiyay hogaamiyayaasha sar-sare
ee Ururka, kuna sugan Eldoret iyo Nayroobi, wararka hoose, kan
diyaar-garowga Maraykanka, kan sirdoonka, falalka Nayroobi iyo Mombasa,
iyo socdaalka cusub ee Ururka kana bilowday Xamar, Xamar iyo Eldoret,
Xamar iyo Mombasa, Kismaanyo iyo Raas-kaambooni, Raas-kaambooni iyo
Mombasa, Edloret iyo Mombasa, Mombasa iyo Nayroobi, Nayroobi iyo Dubai,
Dubai iyo Burco, Burco iyo Hargeysa, Burco iyo Garoowe, Garoowe iyo
Gaalkacyo, iyo waliba Xamar iyo Gaalkacyo?
Yamayska.com baan
ka soo xiganay qoraalkaan
[Column]