Cabaar ka dib markii aan idaacadda BBC-da qaybteeda Focus on Africa aan ka dhageysanay fiidnimadii 7da bishan warar xaqiiqda ka fog oo kana beensheegaya xaaladda dhabta ah ee Buntilaan oo ay waaydan danbaba BBC-du caado ka dhigatay oo uu ka mid ahaa war ku saabsan in la afduubay Marwada Madaxweynaha BL Xaawo Cabdi Samantar (ciridyaanbo) iyo Dr. Maxamed Cali Yuusuf (Gaagaab) oo ka mid ah guddiga Joogtada ah ee Baarlamaanka Buntilaan ayaa waxa xarunta Wararka ee Sahan soo Galay Dr. Gaagaab, waxaana na dhex martay sheekadan waraysiga ah.

Oo Maxamed miyaan lagu afduubin, goormaa lagu soo daayay? Ayaan waydiinay abaara 8dii fiidnimo Mar uu Dr. Maxamed Cali Yuusuf Gaagaab noogu soo galay xarunta wararka ee sahan isaga oo kaligiis ah, wuxuuna ku jawaabay; "suuqaaan ka maqlay, in idaacada BBC-da iyo kuwa muqdisho iyo qaar ka mid taageerayaasha carte oo awood barabagaan raadinaya arintaas ay maleegeen, waxaanan xog ku helay in warkaani ka mid yahay qandaraasyo dhawr ah oo ay lacag ku bixiyeen xubno ka mid ah madaxda kooxda Carte, taasoo ujeedkeedu tahay in khalkhal nabadgelyo iyo xasilooni daro looga abuuro Buntilaan, si caalamkana loogu tuso meel fawdo ah sida Muqdisho, qandaraas qaatayaasha oo isugu jira qaar u dhashay Buntilaan iyo kuwo reer Muqdisho ah oo hirgalinta falalkaasi fure u yihiin kala qaadashada lacagtaas ayaana faafinaya beentaas iyo beena kale oo badanba. Waxaase aad ceeb iila ah oo wax laga xishoodo ah in BBC-du noqoto fuliyaha ugu weyn ee qandaraaskaas."

"Marwadii madaxweynaha Buntilaan Xaawo Cabdi Samantar iyada ka waran? Ayaan iyadana Gaagaab waydiinay, wuxuuna taas kaga afceliyay "Goor dhawayd ayaan kaga soo kacay qolka ay degan tahay, ee Hoteel huruuse, aad ayayna u qososhay markii aan u soo galay, waxayna si kaftan ah ii waydiisay in BBC-da iyo internetyada Muqdisho ay ina afduubeen" markaas ayaan ugu jawaabay "Beentu waa faanka kooxda Carte iyo taageerayaashooda"

Gaagaab mar aan waydiinay su’aal ahayd; Hadda ma jiraan wax ahnidaro ah oo aad dareemaysaa? Ayaa waxa uu ku jawaabay, "Haddaan amaandaro dareemayo ama ay ka jirto Buntilaan saacadan anoo kaligay iyo gaarigayga ah ma imaadeen xafiiskiina, iyada ayaana cadayn kuugu filan, aniguna waxa aan halkan u joogaa in aan dadka u akhrino afkaarta ay ka qabaana ka dhageysano Dastuurka cusub ee loo diyaarinayo Buntilaan, anigoo ka mid ahay guddi heer dawladeed ah oo loo xilsaaray"

Oo Gaagaab waxaa la idinku dhaliilayaa in Dastuurka aad soo qaaday macnihiisu yahay, ciyigii wa ka baryay iyo mid u dhadhamaya anaa qoraya, anaa qalaya, annaa qaybinaya, anaana doorasho raba, taas maxaad ka oranaysaa? Ayaan mar kale su’aalay Dr. Gaabaab isaga oo taas ka jawaabayana waxa uu yiri "dastuurkani waa kii Mustaqbalka ee ma aha mid maanta kaliya lagaga tashanayo, waxaana xil ka saaran yahay sixidiisa iyo turxaan bixintiisa qof kasta oo daacad u ah jiritaanka Buntilaan, ma aha jiritaanka xukuumadda iyo dhawrkayaga nin ee gudigga ah, ma jiro qof hubba in uu noqon doono kan dastuurka wax ku hogaamin doona ee waa mid loo siman yahay. Dadaalka aan haatan wadnaana waa mid horudhac ah oo adduunka dimoqraadiga ah xataa uusan wali ku dhaqaaqin, taasoo ah in diyaarinta dastuurka oo sida caadiga ah xilkiisa la saaro koox khuburo ah oo haddii la rabo la soo ijaarto in aanaan isku koobin diyaarintiisa ee aan talada guud ee dadweynaha ku biirino taasoo ah qodob aan ku dhignayn axdiga Buntilaan ee ah go’aan guddigu gaaray si hadhow dastuurka dadka loo soo bandhigayaa u noqdo mid aragtida dadweynaha la jaanqaadi kara, dadkuna waxa ay hadda xaq u leeyihiin in ay ku daraan aragtidooda si looga saaro wixii dhan loo arki karo, hadhaw marka la dhameeyana waxay xaq u leeyihiin in ay diidaan ama ay qaataan xilliga aftida"

Aroornimaddii 6-da bishan ayaan markii ugu horaysay ka maqlay qof igala soo xiriirar dalka dibadiisa oo ii sheegay in uu idaacadda Horn Africa ee Muqdisho ka soo hadlayo ina waydiiyay in aan uga waramo afduubka marwada Madaxweynaha iyo xiisado kale oo ka oogan Buntilaan, waxaana u sheegay in aanan waxba ka ogeyn, aana u dhaqaaqayo in aan soo hubiyo, inyar kadibna waxa aan ka soo laabtay Hoteelka ay degan tahay Marwada Madaxweynaha BL oo la yiraahdo Huruuse Hotel kadib markii nin masuul ah oo halkaas ka shaqaynayay ii sheegay in ay qolkeeda ku jirto.

Dr. Gaagaab waxa uu hadda degan yahay Hoteel Guul oo lagala xiriiri karo Taleefanka ah (002525234744) halka hoteelka kalana uu Taleefankiisu ka yahay (0025252345558)

Dhanka kalana guud ahaan amniga iyo xasiloonida magaalada Bosaaso ayaa ah mid ka mid ah kuwa ugu degan caalamka maanta, waxa kaliya ee ugu weyn ee la tilmaami karaana waxa weeye Maamulkii la doortay oo gudan waayay xilkii ay ummaddu ka sugaysay isuna diyaarinaysa sidii ay wax uga badali lahaayeen hanaanka siyaasadeed ee Buntilaan marka laga reebo 12 nin oo loo xiray in ay ahaayeen abaabulayaashii mudaharaad Gabar dhalinyaro ah oo aan wax loo dilo galabsan ay ku dhimatay xayn ciidanka Booliska ahina ay ku dhaawacmeen. Maxaabiistaas oo aan wali maxkamad la hor keenin.

Sahan Information Center

Bosaaso