- Title: [SW News] ( Dr Osman Salad) Xaalka reer Carta u ekaa "Hooyo illayn
igama kicinayn ee waad iga kacsanaysey"!
- Posted by/on:[AAJ[15 Feb 2001]
Xaalka reer Carta u ekaa "Hooyo
illayn igama kicinayn ee waad iga kacsanaysey"!
Sida lala wada socdo waxaa dhawaan soo galay magaalada Xamar lacag farabadan oo been
abuur ah, taasoo maciishaddii guud ahaan dadka halkaa ku dhaqan gaar ahaanna inta badan ee
danyarta ah hoos u dhigtay. Mudaaharaadyo shicibku sameeyey oo ay weheliyaan is-qabqabsi
siyaasadeed ee kooxda Carta ee sheegata maamulka qaranka Somaliyeed ayaa koox uu hor
kacayo ninkay u caleema-saarteen ra’iisul wasaaraha, waa Ina-Galayre, irdaha soo
xirteen si ay arrinta lacagta oo eed weyn laga saarayo reer Carta ay wax uga qabtaan.
Eedaynta la saarayaa waxaa ka mid ah in ragga soo dejiyey ay yihiin kuwa masruufa kooxda
Carta iyo inay ka soo degtey garoonka ay sheegteen inuu "dawladda" hoos yimaado.
Waxaa kaloo la yaab leh in dadkii lacagta been abuurka ah keenay, intii maxkamad
arrintooda la horgayn lahaa si looga jaaseeyo falkooda dhiigmiiradka ah in
"dawladdu" u celinayso wixii kharash ahaa ee ka galay!! Sow arrintu uma eka,
"Wiil Waal, lugta iyo garabka leg laguugu dar!!" Sida ay ku soo daabaceen
shabakaddooda internetka (http://somaligov.com/ ) waxay kooxdii Ina-Gallayr
go’aamiyeen inay la wareegaan lacagtii been abuurka ahayd. Hase ahaatee qodobbada
go’aankooda waxaa kaloo ka mid ahaa:
"Dawladdu waxay lacagtaa u isticmaali doontaa kharashaad iyo wixii hawlaha
dawladda la xidhiidha, sida Mushahar, Shidaal IWM. Ugu danbeyntii dawladdu waxay ugu
baaqeysaa shacbi weynaha Soomaaliyeed meelkasta oy joogaan inay garab istaagaan dawladooda
si wada jir ahna uga hortagan falalka noocan oo kale ah."
Waxaa la yaab leh in kooxda Carta ay qirato inay lacagtu been abuur tahay, kalana
wareegtey dadkii keenay, una isticmaalidoonto inay arrimeheeda ku fushato. Oo maxaa looga
qaaday burcaddii soo daabacatay? Miyaysan ahayn in la gubo kuwii keenayna sharciga lala
tiigsado. Malaha hunguri iyo awood darro baa diiddan. Maxay ku kala geddisanyihiin in
lacagta been abuurka ah ay burcaddii keentay ay suuqa geliso iyo in dawlad-sheegatadu ay
suuqa soo galiso. So arrintu uma eka hadalkii laga sheegay gabar uu nin kufsaday oo markay
qaylisay hooyadeed hiil ugu timid, ka dibna inkaar qabihii gabadha kufsaday hooyadii
iskula rogay. Markay gabadhii isku dayday inay iyana markeeda ka rogto inkaar qabaha
hooyadeed ayay hooyadii ku tiri gabadhii, "maandhey iska daa waa ina-ragoo lama
dhibee". Oraahdii gabadha ka soo fakatay baa ahayd, "Hooyo illayn igama
kicinayne waad iga kacsanaysey!!" Waxaa la yaab isna sii leh waxa ay rabaan inaan ku
taageerno. Ma dhiig-miirashada ummadda ee ay reer Carta iyo ganacsatada taageerta ee ku
naaxday dhiigga sokeeye, jaqaysana maatada hargeheeda baan taageero ugu sii darnaa? Kolley
anigu maya, adigase ma aqaan!!
Dr. Osman Salad Hersi
Quebec City, Canada
[ News] |